Në Komisionin për Ekonominë dhe Financat po diskutohet për draft programin e punimeve për periudhën 5 shtator-14 tetor.
Deputeti socialist Erion Braçe në përballje me ministren e Financave, Delina Ibrahimaj, ka hedhur akuza mbi qeverinë, duke thënë se nuk ka bërë sa duhet për të mbrojtur shtresat në nevojë.
Marrë shkas për paketën shtesë të ndihmave që Ministria e Financave pretendon të aplikohet së shpejti, Braçe tha se ka tre muaj që flitet për këtë nismë, dhe qytetarët ende nuk kanë marrë asnjë ndihmë nga qeveria.
“Kjo zgjatja kur fillon? Sepse qershori, korriku, gushti iku dhe bëhet fjalë për shtresat më vulnerabël të shoqërisë. Të cilët janë goditur më fortë nga të gjithë të tjerët nga rritja e çmimeve, që këtë muaj vijojnë të mbeten të larta. Sa kohë që tre muaj s’kanë marrë asgjë?! Tani që ngelen edhe katër muaj nga ky vit, kur do të fillojë zgjatja, kur do e marrin këta njerëz atë mbështetje buxhetore. Dhe e dyta; çfarë do marrin, do të jetë e njëjta paketë, në sasi apo e njëjta”, tha Braçe.
Në përgjigje të deputetit, Erion Braçe, ministrja Delina Ibrahimaj tha se paketa e plotë anti-krizë do të prezantohet pas disa ditësh.
“Do të shtyhet miratimi i strategjisë afatmesme të të ardhurave për pas krizës. Për periudhën janar-gusht të ardhurat janë rritur me 18%, dhe për periudhën 4 mujore ne presim rritje të të ardhurave me 8.5%. Ne faktorizojmë ngadalësimin e rritjes ekonomike në pjesën e fundit të vitit.
Paketa e re do të shpallet për pak ditë. Paketa e parë ishte me masa të shpejta, pasi ne parashikonim përmirësim të inflacionit por nuk ndodhi prej luftës, prandaj ne po mendojmë për masa të tjera shtesë dhe më afatgjatë për të mbështetur familjet më vunerabël”.
Braçe: Çfarë është kjo paketa që po punoni?
Ibrahimaj: Po punojmë, do e prezantojmë në vijim.
Braçe: Duhet ta keni të qartë padyshim që keni komunikim me popullin, po ne deputetët meqë jemi në Komisionin e Ekonomisë, nuk mund ti marrim vesh nga TV.
Ibrahimaj: Unë ju thash që paketa e re do të jetë më afatgjatë për çmimet.
