Bota e fëmijëve zë një vend të veçantë në Galerinë Kombëtare të Arteve në një ekspozitë ndryshe, dedikuar me të vegjëlve.
Galeria Kombëtare e Arteve i ka dhënë një hapësirë të veçantë botës së fëmijëve, përmes një ekspozite, e cila iu është dedikuar tërësisht të vegjëlve.
Ekspozita e cila ka formën e një ditari me ilustrime të realizuara ndër vite, në teknika të ndryshme. Në to shfaqen punët e mjeshtrit Abdurrahim Buza me fëmijën e vuajtur pas luftës, ku manifestohet pjekuria e parakohshme, ndërsa nga ana tjetër reflektohet fëmija i pafajshëm i Guri Bulollarit.
“Është ajo botë jo e ndotur, ajo botë e pastër, e çiltër, e sinqertë, e kthjellet dhe kjo manifestohet nëpërmjet një surrealizmi naiv të pikturës së Gurit, por kemi edhe nga pikturat historike mjeshtrin e madh Abdurrahim Buza me portretin e fëmijës ose marrëdhënien e nënës me fëmijën në djep, kemi adultin tek fëmija në këtë rast, pra është e kundërta”, shprehet Artan Shabani, Drejtor i GKA
Dy artistët e tjerë në këtë ekspozitë janë Agim Faja, mjeshtri i ilustrimeve manuale dhe Ledia Kostandini sjellin fëmijën në epokën dixhitale.
“Është një panoramë e plotë e kësaj ekspozitë, një puzzle, në të cilin nuk mungon asnjë pjesë. Janë përballë njëri-tjetrit fëmija, adulti, periudhat, historia, teknikat dhe e gjitha kjo krijon një marrëdhënie shumë interesante. Kjo është një ekspozitë që vërtetë do të uroja që mos të kishte fëmijë që ta humbte. Të gjithë fëmijët që kanë mundësi që ta shikojnë me prindërit, me gjyshërit, është një ekspozitë që nuk është vetëm për fëmijë, por është për të gjithë publikun”, thotë Artan Shabani.
Ekspozita do të jetë e hapur deri në datën 30 korrik në Galerinë Kombëtare të Arteve.
