Varfëria në Shqipëri me kalimin e viteve po fillon të ulet ngadalë. Projekti Borgen i njohur në botë si organizata që punon për trajtimin e varfërisë dhe urisë i ka kushtuar një shkrim vendit tonë me titull: Pse Shqipëria është e varfër ?
Shqipëria, e pozicionuar në Detin Mesdhe, në jug të Italisë, është një nga vendet më të varfra në Evropë. Por pse Shqipëria është e varfër?
Me këtë pyetje e nis artikullin Projekti Borgen, një organizatë ndërkombëtare jofitimprurëse që po trajton varfërinë dhe urinë dhe punon drejt përfundimit të tyre.
Për të kuptuar shkaqet e varfërisë autorja bën një përmbledhje të historisë së vendit që pas rënies së regjimit komunist. Tranzicioni që përfshiu vendin në atë kohë, ndërpreu rritjen ekonomike duke shkaktuar nivele të larta të varfërisë, raporton “AbcNew”.
Pjesa më e madhe e kësaj varfërie në Shqipëri konsiderohet e thellë, ku të ardhurat janë nën standardet minimale të pranueshme, njerëzit përpiqen të plotësojnë nevojat themelore siç janë ushqimi, veshja dhe ngrohja.
Shqiptarët përballen me shërbime të dobëta publike dhe shërbime shoqërore të paarritshme. Shumë qytetarë të cilët nuk përballen me varfërinë, ndihen ende të kërcënuara nga ajo.
Megjithatë në shkrimin e botuar nënvizohen hapat që Shqipëria ka bërë kohët e fundit në uljen e varfërisë. Banka Botërore e klasifikoi Shqipërinë si një vend me të ardhura të mesme më të larta që nga 2010.
Përqindja e shqiptarëve nën kufirin e varfërisë ka rënë ndjeshëm, nga 25.4 për qind e qytetarëve në 2002 në 14.3 për qind në vitin 2012.
Ndonëse Shqipëria historikisht është renditur si vendi më i varfër në Evropë, varfëria në Shqipëri me kalimin e viteve po fillon të ulet ngadalë.
Për autoren e shkrimit të Borgen Project, Shqipëria pas Luftës së Ftohtë, nga tranizicioni i gjatë tani në një kandidat të mundshëm të BE-së dëshmon se ky vend ka potencial të kalojë nga varfëria ekstreme.
