Rreth 300 familje janë izoluar nga bora në Dukagjin, nga Mali i Shoshit deri në Qafë Thorë.
Mësohet se bora në aksin Qafë Thore-Theth arrin në 60 cm dhe se nuk mund të kalohet as me mjete me zinxhirë.
Kështu, të dyja rrugët që lidhin Shkodrën me Dukagjinin janë bllokuar, ndërsa në aksin Breg Lumi-Mali Shoshit ka rreth 40 cm borë dhe rruga është bllokuar.
Prej 5 ditësh banorët janë pa energji elektrike për shkak të bllokimit të kanalit që furnizon me ujë hidrocentralin e fshatit Nderlyse, nga i cili marrin energji elektrike fshatrat e tjerë.
Për pasojë, banorët kanë kërkuar ndihmë dhe ndërhyrje në mënyrë që të zhbllokohen rrugët nga bora dhe po ashtu të zhbllokohet kanali i HC-it, por deri më tani asnjë mjet nuk është dërguar në asnjërën prej rrugëve të Dukagjinit.
Banorët bëjnë thirrje për ndihme ndërsa theksojnë se nuk ka asnjë mjek, duke insistuar për ndërhyje urgjente të institucioneve.
