Ndërprerjet e energjisë elektrike u raportuan në qytetin perëndimor të Ukrainës, Lviv, të hënën pas një shpërthimi “në një objekt kritik të infrastrukturës”, postoi kryebashkiaku i Lviv, Andriy Sadovyi, në Telegram.
“Një pjesë e qytetit është pa energji elektrike. Një e treta e semaforëve nuk funksionojnë”, ka shkruar Sadovyi. “Për shkak të mungesës së energjisë elektrike, është ndërprerë përkohësisht funksionimi i termocentraleve të qytetit, prandaj për momentin nuk sigurohet ujë i ngrohtë”.
Gjeneratorët e energjisë në gatishmëri në disa stacione pompimi janë nisur për të rivendosur furnizimin me ujë, shtoi ai.
Sadovyi u bëri thirrje banorëve të qëndrojnë në strehimore. Vala e sulmeve me raketa të hënën në të gjithë Ukrainën, duket se ka qenë pjesërisht e drejtuar ndaj termocentraleve, urave dhe infrastrukturës tjetër civile. Përveç Lvivit, sulme u raportuan në Kiev, Kharkiv, Mykolaiv dhe Dnipropetrovsk.
Burimi i lajmit: CNN. Përshtatur nga Tirana Today
