Deputeti i LIBRA-s, Ben Blushi ka deklaruar në rrjetin social “Facebook,” se largimi i kompanive “Call Center” nga Shqipëria ishte katastrofë për mijëra të rinj.
Blushi, gjithashtu shkruan se ka një plan për të mos lejuar kompanitë pasi qeveria e “Rilindjes” nuk ka bërë asgjë për të mbrojtur këtë sektor të ekonomisë, duke humbur çdo mundësi negocimi me qeverinë italiane.
Reagimi i Blushit:
“Kompanitë italiane Call-Center që punësojnë më shumë se 30.000 të rinj shqiptarë janë sërish në rrezik.
Qeveria italiane po i përmbahet planit për ti rikthyer këto vende pune në Itali duke shtuar sanksionet dhe gjobat për të mbrojtur tregun e vet te punës.
Nëse disa prej këtyre kompanive do rikthehen duke kufizuar apo mbyllur aktivitetin e tyre në Shqipëri, kjo do ishte një katastrofë për mijëra familje.
Qeveria e Rilindjes nuk ka bërë asgjë për ta mbrojtur këtë sektor të ekonomisë sonë duke humbur çdo mundësi të negoicojë me Qeverinë italiane.
LIBRA e cila ka një numër të madh anëtarësh që punojnë në call center është shumë e ndjeshme për ti mbrojtur këto investime. LIBRA do bëjë gjithshka për të siguruar këto vende pune, duke përfshirë edhe rishikimin e taksave me qëllim që kompanitë të mos largohen.
LIBRA beson se pa punë nuk ka taksa dhe se taksat duhen përdorur për të krijuar punë.
Na duhen vetëm edhe pak ditë për të mbrojtur punën nga qeveria e Rilindjes që për katër vjet shërbeu si call center e krimit“, shkruan Blushi.
