Gjatë 2016-ës janë shuar 40% e koshereve, duke shënuar një vit dramatik për bletërritësit.
Sipas Shoqatës së Bletërritësve të Shqipërisë, nga 360 mijë koshere që numëroheshin gjithsej në të gjithë vendin për vitin 2016, më shumë se 144 mijë koshere nuk e kanë kaluar dimrin.
Humbje këto që llogariten 58 milionë euro, ndërsa bletarët bënë shkaktar kryesor të humbjeve, kultivimin masiv të hashashit në vend.
Vetë Kryetarja e Shoqatës së Bletërritësve të Shqipërisë, Lejla Shehu, ndërthur shumë faktorë që kanë çuar në këtë humbje, si: dimri i acartë, mungesa e standardeve në mjekim dhe përhapja masive e rriqrës kanë qenë faktorët kryesorë, që kanë çuar në humbje. Megjithatë, ajo nuk e përjashton faktin se kultivimi i drogës ka ndikuar negativisht, por shpjegon se nuk ka fakte shkencore ose të dhëna laboratorike për këtë fakt.
Refik Kutrelli, nga Librazhdit, humbi këtë vit të 27 kosheret e bletëve. Kjo familje, përveç bagëtive, e kishte burim kryesor të ardhurash mjaltin.
“Nuk kam bërë analiza se pse bletët vdiqën, pasi ato kanë ikur për kullotë dhe nuk janë kthyer më. Të gjitha mjekimet i kam bërë. Ilaçet më vinin nga Greqia”, thotë bletërritësi për Monitor.
Gjithashtu, Shyqyri Poçi, nga Komuna e Malziut në Kukës, inxhinier pyjesh dhe që merret me bletarinë në një zonë ku dominon gështenja, tha se ky vit qe dramatik për komunën. Ai u shpreh se rreth 80 për qind e bletëve nuk e kanë kaluar dimrin, ndërsa e gjithë komuna llogaritet të ketë humbur rreth 1.500 bletë.
Sipas përllogaritjeve, humbjet nga bletët e vdekura në rang kombëtar, arrijnë në rreth 60 milionë euro.
Një fermer nga Tirana, i cili humbi të gjitha 171 kosheret e tij, ka bërë analiza laboratorike në Turqi dhe ka gjetur se bletët kanë vdekur, pikërisht, nga kullota në bimët e hashashit.
