Bashkëthemeluesi i Microsoft dhe gruaja e tij thonë se ata do të vazhdojnë të punojnë së bashku në Bill & Melinda Gates Foundation, fondacioni më i madh bamirës në botë.
Bill dhe Melinda Gates njoftuan në tweet-et identike të hënën se ata po i japin fund martesës së tyre 27-vjeçare.
Ata thanë se “nuk besojnë më” se mund të zhvillohen si çift.
Manjati amerikan i biznesit dhe bashkëthemeluesi i Microsoft është njeriu i tretë më i pasur në botë.
Të dy u takuan gjatë një darke biznesi në vitin 1987, kur Melinda Gates ishte menaxhere e produkteve të Microsoftit. Çifti më pas u martua rreth shtatë vjet më vonë.
Detajet financiare të divorcit nuk janë zbuluar. Të dy kanë nënshkruar për Giving Pledge të Warren Buffett, duke premtuar të dhurojnë pjesën më të madhe të pasurisë së tyre për qëllime bamirësie.
Çfarë shkruajnë Gates?
“Pas një reflektimi të madh dhe shumë pune në marrëdhëniet tona, ne kemi marrë vendimin t’i japim fund martesës tonë,” shkroi Gates në Twitter.
“Ne kemi rritur tre fëmijë të mrekullueshëm dhe kemi ndërtuar një fondacion që punon në të gjithë botën për t’u mundësuar të gjithë njerëzve të bëjnë jetë të shëndetshme dhe produktive”, thanë ata.
“Ne kërkojmë hapësirë dhe privatësi për familjen tonë, ndërsa fillojmë të ecim në këtë jetë të re.”
Çfarë do të thotë kjo për Fondacionin Bill & Melinda Gates
Pavarësisht nga fundi i martesës së tyre, Gates thanë se do të vazhdojnë të bashkëpunojnë në Bill & Melinda Gates Foundation.
“Ne vazhdojmë të ndajmë besimin në atë mision dhe do të vazhdojmë punën tonë së bashku.”
Pasuria e fondacionit është mbi 50 miliardë dollarë (41.4 miliardë euro), sipas një raportimi taksash të cituar nga transmetuesi amerikan CNBC.
Që nga fillimi i punës në vitin 2000, bamirësia është përqendruar në çështjet globale të shëndetit dhe zhvillimit, si dhe arsimin në SHBA.
Gates kanë investuar shuma të mëdha parash edhe në kërkimin e vaksinës kundër koronavirusit dhe kanë bërë donacione për mjekimin e COVID-19. /DW/
