Policia Rrugore ka zhvilluar një aksion për rritjen e parametrave të sigurisë rrugore, konkretisht për përdorimit e rripave të sigurisë dhe sistemeve të fiksimit për fëmijët që transportohen në mjete.
Ky aksion është kryer nga 11 shtator deri më 16 shtator, ku janë kontrolluar gjithsej 18,230 mjete, të përqendruara në oraret 09:00-11:00 dhe 17:00-20:00.
Nga ky aksion, policia njofton se janë pezulluar në total 36 leje drejtimi për transport të parregullt fëmijësh dhe janë ndëshkuar 2170 drejtues mjetesh për mosvendosje rripi sigurimi.
Gjithashtu, policia ka publikuar bilancin tragjik të 20 muajve të fundit, konkretisht nga 1 Janar 2016 deri në 31.08.2017, ku rezulton se:
-Kanë ndodhur 366 aksidente me përfshirjen e fëmijëve të moshës 0 vjeç deri 15 vjeç, me pasoja:
- 30 fëmijë të vdekur;
- 64 të plagosur rëndë;
- 272 të plagosur lehtë;
Në njoftimin e policisë, thuhet se synimi i kontrollit “TISPOL-SHTATOR 2017” është:
- Ndërgjegjësimi dhe edukimi i drejtuesve të mjeteve për të rritur shkallën e përdorimit të rripit të sigurimit dhe të sediljeve të posaçme për transportin e fëmijëve .
- Bashkimi dhe “përqafimi i rekomandimit dhe aksionit të përbashkët” të grupimit të Policive Rrugore të vendeve të Bashkimit Europian në javën e fushatës së ndërgjegjësimit të zbatimit të rripave të sigurimit nga drejtuesit e mjeteve, aksion dhe kontroll që kryhet njëkohësisht në një javë nga të gjithë Policitë Rrugore të mësipërme;
- Transporti i sigurt i fëmijëve është një nga prioritetet në të gjithë vendet e BE-së dhe një nga prioritetet edhe të Policisë Rrugore në Shqipëri;
- Komunikimi dhe këshillimi + edukimi gjatë javës me një numër të madh drejtuesish mjetesh dhe prindër që transportojnë fëmijë nga banesat në drejtim të shkollave të çdo niveli dhe anasjelltas;
Në fund, Policia Rrugore bën thirrje për vendosjen e rripit të sigurimit për të shpëtuar jetën gjatë udhëtimit.
“Drejtues mjeti, prindër: vendosja e rripit të sigurimit shpëton jetën tuaj dhe të fëmijëve tuaj…
NUK KA ME TË SHTRENJTË SE JETA E FËMIJËVE !
Duke vendosur rripin e sigurimit ju jeni bërë aleat me Policinë Rrugore”, përmbyllet njoftimi i Policisë Rrugore.
