Ministri i Financave dhe Ekonomisë në ikje, Arben Ahmetaj, ka bërë bilancin ekonomik për vitin 2018. Në një bashkëbisedim me gazetarët, ai vuri theksin tek rritja ekonomike. Duke u ndaluar tek akuzat që vijnë nga opozita, ai ia ktheu përmes shifrave, teksa u fokusua tek punësimi dhe rezultatet. Për të, gjatë tre viteve të fundit, shqiptarët kanë parë rritje ekonomike, si rezultat edhe të krjimit të vendeve të reja të punës.
“Në 3 vitet e fundit, punësimi është rritur me 10.7%. Pjesëmarrja e forcave të punës po arrin në 67%. Të gjithë analistët që duan ta bëjnë llum punën, t’u referohen shifrave dhe përtej shifrave ka mëndje, zemra dhe familjarë që shkojnë në punë çdo mëngjes.
Unë jam dakord me logjikën e kryeministrit që thotë nuk është mjaft, asnjëherë nuk është mjaft. Pritshmëria është shtysë kryesore për të bërë reforma. Shifrat janë kokëfortë, pavarësisht se në banaqet e zakonshme thuhet ‘ku janë investimet e huaja’.
Po të dilni nga banaqet, mund t’i dalloni dhe t’i prekni. Sot kemi 684 mijë të punësuar në sektorin jo bujqësor. 31 750 më shumë të punësuar që nga shtatori i 2017-ës. Patjetër që Shqipëria nuk është një vend i pastër, por e kemi lënë mbrapa 2013 edhe 2015-ën në fakt. Konsumi final i popullatës ka ardhur duke u rritur, dhe po ta shikoni në nëntëmujorin e 2018-ës është më i lartë.
Do t’ju lutesha ta fiksonit grafikun e borxhit publik. Këtu sulen analistët, ndaç edhe opozita, por kjo besoj do e falenderojë. Sot borxhi publik është 63.6 % neto. Shikoni ku e morëm. Është 10% më i ulët se ditën kur e morëm”.
