Prokurorja e Përgjithshme, Arta Marku ka fituar betejën ndaj prokurores Rovena Gashi, pasi kjo e fundit e kishte hedhur në gjyq, pas lirimit nga detyra si drejtoreshë e Marrëdhënieve me Jashtë.
Sipas Gjykatës, urdhri për lirimin nga puna të Rovena Gashit, ishte i ligjshëm, ndërsa e ka konsideruar vendimin e Markut, si një diskrecion personal.
Avokati i Gashit, Çlirim Gashi tha se ky është një vendim i turpshëm dhe se vjen teksa të gjithë gjyqtarët kanë frikë nga Vettingu, ndërsa jep alarmin se asnjë nëpunës në administratën e shtetit nuk është i sigurt.
“Kjo që ndodhi është e turpshme. Vendimi është marrë nga frika e Vettingut. Gjyqtari është gati të argumentojë edhe që dita është natë, jo vetëm ai por të gjithë gjyqtarët nga frika. Asnjë nëpunës i Shqipërisë, nuk është i sigurt sot përballë drejtuesve, sepse sipas Gjykatës gjithçka është rregullim i brendshëm, dhe urdhri i Markut ka diskrecion sekret. Çdo nëpunës i shtetit është i pasigurt dhe kjo konsiderohet rregullim i brendshëm. Nuk e di ç’do na gjejë të nesërmen”, tha Gjata për mediet.
