Ish-kryeministri i Italisë, Silvio Berluskoni ndodhet në gjendje të rëndë shëndetësore, ndaj është vendosur që të pezullohet përkohësisht gjyqi ndaj tij, me akuzat e korrupsionit të dëshmitarëve ndaj çështjes së prostitucionit.
Në një deklaratë për mediat, prokurorja Tiziana Siciliano, tha se Berluskoni vuan nga një patologji e rëndë të cilën mund ta verifikojnë çertifikatat mjekësore, ndërsa avokati i tij tha se ai po mbahet nën kujden mjekësor nga shtëpia, shkruan ANSA.
“Ne patjetër besojmë se Berlusconi është i sëmurë rëndë dhe vuan nga një sëmundje serioze. Kjo është ajo që tregojnë çertifikatat mjekësore dhe konsulencat,” tha ajo.
Ndërkohë, nga prokurorët u kërkua që gjyqi të vazhdojë për 28 të pandehurit e tjerë, të cilët kanë të drejtë për një gjykim brenda një kohe të arsyeshme, sepse kjo ka vazhduar për një kohë të gjatë.
Berluskoni akuzohet se i ka dhënë ryshfet dëshmitarëve për të heshtur në lidhje me çështjen e prostitucionit me të mitur, që në vitin 2013.
