Ish-kryeministri Sali Berisha ka bërë një deklaratë të fortë, kur tha se nëse Greqia shtrin territorin e saj detar deri në 12 milje, Shqipëria humbet triliona Euro naftë dhe gaz.
Në emisionin “Zonë e Lirë” , Berisha tha se territori që humbet Shqipëria është me qindra kilometra katror.
“Tani kanë ndryshuar rrethanat dhe tani Greqia ka kërkuar 12 milje, se atëherë ishte për 6 milje. Shqipëria me 12 milje humbet qindra kilometra det dhe zonat që mbajnë triliona Euro naftë dhe gaz”, tha Berisha.
Më tej ish-kreu i qeverisë tregoi dhe përparësitë e Shqipërisë me marrëveshjen e 2009-ës, kur vendet ranë dakord për zgjerim deri në 6 milje.
Po ashtu ai tha se “nuk i diktojmë ne Greqisë që të qëndrojë me 12 milje apo me 6 milje, por nëse do jemi në gjykatë apo në negocim nuk mund të lejohet të ndryshojë rregullat”.
