Ish-kryeministri Sali Berisha i ka dalë në mbrojtje ish-kryeprokurorit Adriatik Llala në përplasjen publike që ky i fundit ka pasur me Ambasadorin Amerikan, Donald Lu. I ftuar në edicionin e lajmeve të “Abc News”, Berisha u shpreh se nuk mund të akuzosh një person si të korruptuar, pa pasur prova të faktuara.
“Deklaratat e Lu-së janë të gabuara dhe nuk shkojnë në këtë mes. Nuk mund të akuzosh dikë si të korruptuar, pasi pafajësia dhe prezumimi i saj janë parim themelorë i një vendi demokratik. Ti mund ta urresh një person, mund ta ofendosh kur je në politikë, por kur je diplomat nuk mund të sillesh në këtë mënyrë”, u shpreh Berisha.
Ditën e djeshme, doli një letër që Llalla i kishte dërguar Kongresit Amerikan, ku i njoftonte se Lu i kishte bërë presione për arrestimin e Ilir Metës në kohën që ky i fundit drejtonte parlamentin.
I menjëhershëm ishte edhe reagimi i ambasadorit, që mohoi akuzat e Llallës duke kujtuar se ish-kryeprokurori është nën akuzë për korrupsion dhe se rrezikon burgun.
