Pritja e Etrit Berishës i siguroi Atalantës një pikë të artë në betejën e këtij sezoni në Serie A. Numri 1 i portës bergamaske ndali lojtarin më në formë të momentit, Paulo Dybala vetëm pak minuta përpara fundit nga pika e bardhë duke u kthyer në kryefjalë të mediave pranë ekipit zikaltër. Vetë portieri i Kombëtares Shqiptare e komenton si një lëvizje të menduar atë ndërhyrje në intervistën dhënë për mediat e vendit fqinjë. “E vendosa nga do të hidhesha në momentin që po bëhesha gati. Edhe pse e kam studiuar sesi ai i godet penalltitë, ishte shumë e vështirë, por prita deri në fund dhe mundova ta mbyllja hapësirën me topin”, thekson Berisha.
Si ndihesh kur i pret penallti Dybala?
E vendosa në momentin e fundit. Edhe pse e kam studiuar sesi ai i godet penalltitë, ishte shumë e vështirë, por prita deri në fund dhe u mundova ta mbyllja hapësirën me topin.
Goli i parë ishte përgjegjësi e juaja…
E pashë topin vetëm në sekondën e fundit dhe mbeta në dyshim: ta bllokoja, apo ta shtyja. Gabova dhe topi më rrëshqiti.
Si e sheh një portier përdorimin e teknologjisë në fushë?
Shpenzohet shumë kohë në fushë. Sipas meje tani e në vazhdim duhet të përshtatemi me këtë risi, thjesht duhet të shpejtohen kohët e marrjes së vendimit.
Si është t’i presësh një penallti një lojtari që nuk kishte gabuar kurrë?
Shumë bukur, sepse realisht Dybala nuk kishte humbur asnjë penallti në Seria A. Por, më e rëndësishme për ne ishte që të merrnim një pikë ndaj skuadrës që dominon në Itali prej vitesh.
Si keni punuar për të arritur 90 minuta me këtë intensitet?
Ne kemi një grup që punon kaq shumë së bashku dhe pastaj kemi edhe një trajner që na jep shumë vlera. Ai është ekspert në përgatitjen e lojërave.
/Tirana Today/
