“Të merren të dhënat nga institucionet që diskutojmë për fenomenin e tjetërsimit të votave”. Ky ka qenë thelbi i kërkesës së avokatit të PD-së në Komisionin e Ankesave dhe Sanksioneve (KAS) Marash Logu. Kjo kërkesë e Logut ka rikthyer debatin përpara mediave me Ilir Rusmalin, pasi ky i fundit i ka kërkuar shifra të votave të tjetërsuara në Berat.
Debati Logu-Rusmali
Rusmajli: Sa raste keni për blerje votash?
Marash Logu: Ne kemi konsideruar raste të shumta të cilat janë denoncuar. Cila është arsyeja që refuzoni ti merrni këto prova nga Prokuroria? Nuk bëjmë ne kallëzime të rreme.
Rusmajli: Ke dhënë dy përgjigje. Ke thënë kemi raste të shumta, dhe përgjigjen nuk kemi shifër kërkojani Prokurorisë. Për mua janë të mjaftueshme. Ju keni përmendur 22 raste, ku i keni rastet? A mund ti konvertoni në vota këto 22 raste përdorimi, sa vota kanë tjetërsuar? Sa kanë ndikuar te votat? Apo është e pamundur objektivisht?
Marash Logu: Për të 22 rastet kemi depozituar ato prova që kemi pasur në dispozicion, foto, video, artikuj. Për të kuptuar përmasat reale të këtyre fenomeneve, kjo është arsyeja pse kemi kërkuar të merren informacione zyrtare nga institucione shtetërore, rast pas rasti për të dalë në përfundimin që për shkak të kësaj shkelje pati kaq njerëz që përfituan një leje legalizimi, pati kaq njerëz që përfituan shtesë në ndihmë ekonomike, pati kaq njerëz që u punësuan. Kuantifikimi që ju kërkoni, mund të dalë nëse ju pranoni të administroni prova që janë kërkuar nga PD.
Rusmajli: Ju nuk e dini këtë. Ju nuk e dini çfarë do bëjmë neve? Ju nuk i kuantifikoni dot, por institucionet mund ti kuantifikojnë. Përmendët referencë historinë e lejeve të legalizimit. Domethënë 100 mijë kërkesa për leje legalizime të pa trajtuara ende sikurse është në fjalën e z. Lame. Nga ky total, ju jeni në dijeni sa raste i përkasin qarkut të Beratit?
Marash Logu: Ne jemi parti politike, nuk administrojmë të dhëna zyrtare. Kërkojini Agjencisë së Kadastrës sa është numri i lejeve të legalizimit të dhëna për periudhën janar-prill 2021. I nderuar si mund të kemi ne të dhëna shtetërore private! Aq sa kemi ua kemi vënë në dispozicion. Për të tjera, kemi kërkuar të administrohen. Pse nuk e bëni pyetjen pse nuk i administroni?
