Shqipëria do të vijojë të ndikohet nga temperatura të larta dhe mot kryesisht i kthjellët gjatë fundjavës dhe në fillim të javës së ardhshme.
Sipas parashikimeve meteorologjike, termometri pritet të arrijë deri në 35 gradë Celsius, veçanërisht në zonat e ultësirës perëndimore, duke krijuar kushte ideale për pushuesit që zgjedhin bregdetin.
Meteorologu Elvi Jahaj, nga Shërbimi Meteorologjik Ushtarak, bëri me dije se vendi do të mbetet nën ndikimin e kushteve atmosferike të qëndrueshme.
“Përgjatë fundjavës dhe në ditët e para të javës së ardhshme moti do të jetë kryesisht i kthjellët në pjesën më të madhe të territorit. Herë pas here do të ketë vranësira të pakta deri mesatare kalimtare, ndërsa në zonat malore përgjatë relieveve lindore priten reshje të dobëta shiu,” u shpreh Jahaj.
Temperaturat maksimale në ultësirën perëndimore do të luhaten nga 33 deri në 35 gradë Celsius, ndërsa në zonat malore do të regjistrohen vlera nga 30 deri në 32 gradë Celsius.
Sa i përket temperaturave minimale, në zonat malore ato do të zbresin në 10-13 gradë Celsius, ndërsa në ultësirën perëndimore do të variojnë nga 14 deri në 18 gradë Celsius.
Era do të fryjë me një shpejtësi mesatare prej 7 m/s, ndërsa në ditë të caktuara mund të arrijë deri në 14-15 m/s.
Sipas specialistëve, temperaturat e ditëve të fundit rezultojnë 1 deri në 3 gradë Celsius mbi mesataren klimatike mujore.
