Ministri i Jashtëm i Kosovës Behgjet Pacolli do të takohet me homologun gjerman, Heiko Maas. Në njoftimin për shtyp, mësohet se mes tyre do të diskutohet për temat aktuale të Ballkanit Perëndimor, ndërsa pas takimit pritet të ketë edhe një prononcim për media nga dy ministrat.
Po ashtu, në njoftimin e publikuar nga Ministria e Punëve të Jashtme të Kosovës, thuhet se Maas dhe Pacolli do të bisedojnë ndër të tjera edhe për nevojën “e pranisë edhe më të madhe të ekonomisë dhe investimeve gjermane në Kosovë, njohjen reciproke e patentave të shoferëve mes shtetasve të Gjermanisë dhe Kosovës, përkrahjen edhe të mëtejshme të diplomacisë së Gjermanisë në njohjet e shtetit të Kosovës etj.”
Pacolli kërkoi në dhjetor që Gjermania të jetë udhëheqëse në çështjen e liberalizimit të vizave për Kosovën. Gjermania deri tani ende nuk ka dalë me një vendim për këtë çështje. Sipas burimeve të DË, vendimi ka ngecur te Ministria e Punëve të Brendshme të Gjermanisë.
