Një lëvizje e papritur ka ndodhur në “Old Trafford”, ku Zlatan Ibrahimoviç ka vendosur që të largohet nga Manchester United dhe ti bashkohet ekipit të LA Galaxy. Bomberi suedez nuk po kalonte një formë të mirë në Premier League dhe këtë sezon regjistronte vetëm 7 paraqitje. Duke mos qenë i përfshirë në planet e Jose Mourinhos, Ibra vendos që të transferohet në “Major League Soccer” për të luajtur rregullisht dhe këtë hapësirë mund ta gjente vetëm jashtë Europës.
“Vendosa të nënshkruaja me Galaxy sepse mendoj se është vendi i duhur për mua”, ka thënë fillimisht Ibrahimovic.
“Unë kam shumë për të dhënë, mund t’i ndihmoj shumë dhe ata janë ekipi më i mirë në SHBA. Nuk kishte asnjë dyshim. Unë kam shumë pritje këtu, kam vënë presion mbi veten time, kërkoj shumë në lojën time. Unë mezi pres që të luaj, duhet të luaj”, shtoi suedezi.
“Jam si një fëmijë i vogël që ju i jepni karamele për herë të parë dhe ai kërkon karamele gjithë kohën. Kjo është ajo që kam nevojë. Duhet të luaj dhe dua të luaj. Jam i uritur të luaj sepse jam larguar shumë tani, nuk jam ndier i përfshirë në lojë dhe më duhet të ndihem i përfshirë. Sepse kjo është ajo që unë kam qenë duke bërë gjithë jetën time”, përfundoi Ibrahimoviç.
