Befason “Fenomeni”: Peng që nuk vesha fanellën e PSG-së, Neymar…

Ai njihet si lojtari me talent të lindur dhe që për sa vite luajti qëndroi në majën e futbollit profesionist edhe pse dëmtimet ia shkatërruan disi karrierën. Ish-sulmuesi i Interit, Barcelonës dhe Real Madrid ka komentuar superpërballjen e Champions League mes madrilenëve dhe PSG-së dhe u shpreh se e pret me padurim këtë sfidë. “Fenomeni” e ka bërë këtë në një prononcim për “SFR Sport”, teksa ndodhej në Paris, i ftuar special i Neymar.

Ai është shprehur se Parisi ishte si shtëpia e tij, duke pasur parasysh se sa shpesh e ka vizituar atë dhe se do ti kishte pëlqyer të ishte pjesë e tyre në një pikë të karrierës së tij. “Ka klube, me të cilat do të më pëlqente të luaja, nëse do të isha në aktivitet. Një prej tyre është PSG. Unë kam ardhur në Paris disa herë. Jeta ime ka qenë kaq shumë herë e lidhur me këtë qytet, sa ndihem si parisien, por kurrë nuk e kisha këtë mundësi. Kam luajtur në klube të mëdha europiane. Karriera ime më mori në Itali, Spanjë dhe Holandë”.

Ronaldo ka pasur një përballje me PSG-në në finalen e “Recopa”, në kohën kur mbante fanellën e Barcelonës dhe që përfundoi me rezultat 1-0, gol të cilin e shënoi pikërisht ai. Nga ana tjetër, ai foli për dy yje të grupit parisien. Së pari e bëri këtë për Kylian Mbappé, tek i cili sheh ngjashmëri me lojën e vet: “Ai duket si unë”. Në fund lavdëroi edhe bashkëkombësin e tij, Neymar: “Ai ka gjithçka për ta fituar “Topin e Artë” në Paris”.