Bashkimi Europian në Shqipëri reagon lidhur me protestat e studentëve. Në një postim në faqen zyrtare në Facebook, shkruhet se protestat paqësore janë një shprehje e shëndetshme e demokracisë.
Ndërsa, më tej BE sugjeron që studentët të dialogojnë që këto kërkesa të kthehen në zgjidhje konkrete.
“Protestat paqësore të studentëve në Shqipëri janë një shprehje e shëndetshme e demokracisë. Ekziston një konsensus i gjerë publik në shoqërinë shqiptare lidhur me kërkesat e tyre. Studentët bëjnë thirrje për standarde më të mira arsimore. E drejta për arsim është qendrore në çdo shoqëri. Ashtu siç është lufta kundër korrupsionit. Tani është koha për të ndërtuar një dialog që siguron që këto kërkesa të përkthehen në zgjidhje konkrete dhe praktike”, shkruhet në reagimin zyrtar.
