BDI ka vendosur që të jetë pjesë e koalicionit qeveritar të udhëhequr nga LSDM-ja e Zoran Zaev. Lajmi është konfirmuar nga nënkryetarja e BDI-së, Teuta Arifi. Ajo tha se edhe programi i qeverisë është gati dhe për këtë pjesë BDI ka dhënë pëlqimin e saj.
“Gjithmonë kur ka pasur situata të formimit të qeverisë, është bërë konsultim më i gjerë për t’u arritur deri në kryesinë qendrore. Kjo ka qenë mënyra e punës e jona, e kryesisë, e anëtarëve të kryesisë, e kështu me radhë, dhe besoj se këto konsultime sigurisht do të vazhdojnë për t’u marrë mendime, jo vetëm me anëtarët e partisë, por edhe mendime më të gjëra. Sigurisht që Zaev ka një program për të cilin ne i kemi përfunduar bisedimet dhe është program me të cilin ai mund të paraqitet në Bruksel”, tha nënkryetarja e BDI-së, Teuta Arifi.
