Media prestigjoze ‘’BBC’’, duke iu referuar një raporti të Agjencisë së Mjedisit të BE, shkruan se një në katër vdekje në Shqipëri vjen si pasojë e ndotjes së ajrit.
Sipas raportit Shqipëria është një nga vendet ku numri i vdekjeve nga ndotja është rekord, gati 23 përqind e totalit te vdekjeve.
Lidhur me këtë raport ka reaguar edhe zëdhënësja e PD, Ina Zhupa, e cila përmes një postimi në Facebook thekson se Tirana është qyteti me ndotjen më të madhe.
Sipas Zhupës, betonizimi masiv dhe i pakufijshëm që kryebashkiaku Erion Veliaj i ka bërë Tiranës i përballë qytetarët çdo ditë me rreziqe serioze me shëndetin.
Postimi i Zhupës në Facebook
Një në katër vdekje në Shqipëri vjen si pasojë e ndotjes së ajrit. Kështu raporton BBC, duke iu referuar një raporti të Agjencisë së Mjedisit të BE. Sipas raportit Shqipëria është një nga vendet ku numri i vdekjeve nga ndotja është rekord, gati 23 përqind e totalit te vdekjeve.
Tirana është qyteti me ndotjen më të madhe, qyteti që po rrit përditë rrezikun e vdekjes së qytetareve të tij me ndotjen që vetëm shtohet si pasojë e betonizimit masiv dhe të pakufijshëm të saj.
Përkundrejt propagandës së Veliajt me pemë edhe me biçikleta, kemi një Tiranë që është betonizuar masivisht. Kullat janë bërë e zakonshme e zonës kryesore të qytetit të Tiranës.
Ajri që ne thithim në Tiranë është i rrezikshëm për shëndetin tonë, është burim kanceri dhe burim vdekjeve.
Për shëndetin e fëmijëve tanë, për shëndetin e prindërve tanë, për shëndetin tonë, duhet ndalur kthimi i Tiranës në qytetin e vdekjeve nga ndotja e ajrit, në qytetin e pajetueshëm nga betonizimi!
