Këshilli Bashkiak i Lezhës ka miratuar ditën e sotme buxhetin e vitit 2020, i cili ka vlerën e rreth 1.8 miliardë lekë.
Por ajo çfarë bën habi është se në këtë buxhet nuk është përfshirë fondi për rindërtimin e ndërtesave të dëmtuara nga tërmeti 26 nëntorit.
Kryetari i Bashkisë, Pjerin Ndreu tha se do të pritet dalja e aktivit normativ nga qeveria, për të parë se cila do jetë mbështetja që do marrin prej saj. Sipas tij, në këtë mënyrë edhe bashkia do mund të bëjë planifikimin e tyre për fondin në ndihmë të të prekurve nga tërmeti.
Nga buxheti i vitit të ardhshëm 400 milionë do të shkojnë vetëm për investime.
“Mund të alokojmë edhe të gjithë fondin e investimeve për tërmetin. Ne nuk thamë jo as po por ne jemi të varur nga një procedurë ligjore që po miratohet. Dhe nëse do të marrim një vendim bashkiak në kundër kohë me aktin normative dhe me aktet e tjera që i vendos qeveria dhe i firmos presidenti. Ne nuk thamë që e kemi siguruar fondin, atë fond që për një pjesë të familjeve do i japim direkt në dorë. Por nuk mund të veprojmë pa një gjë që nuk është qartësuar ligjërisht se cila është fasha që do mbajmë ne dhe cila është pasha që do mbajë ministria e rindërtimit”, tha Ndreu.
