Pas apelit të një nate më parë për familjen e gjyqtares së vrarë nga bashkëshorti, Bashkia e Tiranës ndërmerr një sërë iniciativash për familjen e të ndjerës.
Mësohet se një banesë ose pagesa e qirasë, bursa apo edhe transporti publik falas, janë mundësitë që po vlerëson Bashkia e kryeqytetit për familjen Fildes Hafizi, pas apelit publik për ndihmë.
Pas intervistës në “Ora News” me fëmijët dhe prindërit e gjyqtares Hafizi, Bashkia e Tiranës është angazhuar në marrjen e disa iniciativave për lehtësimin e kushteve të jetesës së tyre.
Skuadra e Shërbimit Social i është drejtuar banesës së gjyqtares së Shkodrës, e ekzekutuar pak ditë më parë nga ish-bashkëshorti, për të biseduar me familjarët e saj, me qëllim për të bërë një vlerësim më të detajuar të situatës dhe gjendjes së tyre ekonomike.
Po ashtu, bëhet me dije se Bashkia e kryeqytetit po vlerëson mundësinë e një shtëpie ose pagesën e qirasë për Melissën, Arlindin dhe prindërit e Fildesit.
Sakaq, bashkia e Tiranës ka menduar ta ndihmojë familjen me mobilimin e shtëpisë, ndërsa për fëmijët e mbetur jetimë do të sigurojë bursë për të vazhduar studimet dhe mundësi transporti falas.
Pas konstatimit të gjendjes ekonomike nga skuadra e Shërbimit Social, Bashkia e Tiranës ka nisur menjëherë nga puna për t’i garantuar familjes strehë dhe fëmijëve mundësi arsimimi.
