Mjaft e bujshme ishte përplasja në rrjetet sociale mes Noizyt dhe Eduart Ndocaj. Gjatë kohës së protestave masive, reperi i bënte thirrje studentëve, se zgjidhja gjendej vetëm në sajë të dialogut. Kaq ka mjaftuar, që një koment të pasonte nga Ndocaj, ku e cilësonte reperin “këngëtar tallavaje dhe me 5-vjeçare”.
“Noizy i tallavasë me 5-vjeçare u jep mend mbi 10 mijë studentëve që s’kanë lekë për të mbaruar studimet, dhe i bashkohet velinës dhe bandës së Edvinit me paturpësinë më të madhe”, shkruante politikani. I ftuar në “Xing me Ermalin”, Eduart Ndocaj foli për herë të parë për këtë postim, që u komentua shumë në media.
“Isha në Orosh në një shkollë pa energji elektrike, dhe aty rastësisht në tualet pashë që fëmijët kishin shkruajtur emrin e grupit të Noizyt; OTR. E filmova, e publikova dhe ishte ironike, sepse Noizy u bashkua me anti-studentët. Duke qenë se Noizy nuk e di nga e ka derën universiteti, thashë ç’ne ky?! Sipas thashethemeve, ai ka marrë një leje për një pallat në Durrës, që të thonte këtë. Nuk dua të shpik, por kështu kam dëgjuar”, u shpreh Ndocaj.
Pas kësaj deklarate, Ermal Mamaqi mori Noizyn live në emision për ta pyetur nëse kjo është e vërtetë. Noizy mohoi në mënyrë kategorike se ishte i përfshirë me politikën, dhe se çdo gjë e kishte bërë për të mbrojtur të rinjtë.
“Atë postim nuk e kam bërë për asnjë çështje interesi, por për të mbrojtur të rinjtë, sepse ata mund të ishin të afërm të mi, janë fansat e mi, mund të isha unë ose motra ime. Nuk është bërë për asnjë çështje politike. As nuk kam lidhje fare. Mua s’më rruhet për asnjë anë politike, se unë gjithçka e kam bërë me forcën time”, tha Noizy.
