Udhëheqësit e Francës, Gjermanisë, SHBA-së dhe Britanisë së Madhe kanë lëshuar një deklaratë të përbashkët duke fajësuar Rusinë për sulmin ndaj ish-spiunit rus në Salisbury, pasi Moska tha se do të dëbojë diplomatët britanikë në hakmarrje për veprimin e Theresa May kundër Kremlinit.
May mori një nxitje të madhe lidhur me përplasjen e saj me zyrtarët e lartë rusë, pasi Emmanuel Macron, Angela Merkel dhe Donald Trump – tre nga aleatët kryesorë të Mbretërisë së Bashkuar – ranë dakord me vlerësimin e saj se nuk kishte ‘asnjë shpjegim alternativ të besueshëm’ për sulmin në fjalë.
Në deklaratë thuhej ndër të tjera se “Mbretëria e Bashkuar informoi tërësisht aleatët e saj se ishte shumë e mundshme që Rusia ishte përgjegjëse për sulmin.”
Po ashtu, në deklaratë dënohej përdorimi i agjentit nervor për sulmin në Evropë, gjë që nuk kishte ndodhur që nga Lufta e Dytë Botërore, duke e cilësuar atë një sulm ndaj sovranitetit të Mbretërisë së Bashkuar.
Britania e Madhe ka dëbuar së fundmi 23 diplomatë rusë, ndërsa nga ana tjetër, Rusia ka mohuar të jetë përfshirë në këtë sulm.
Më herët, ministri i Jashtëm rus tha se shumë shpejt Rusia po ashtu do të dëbojë të gjithë diplomatët britanikë.
DEKLARATA E PLOTË E PËRBASHKËT:
“Ne, udhëheqësit e Francës, Gjermanisë, Shteteve të Bashkuara të Amerikës dhe Mbretërisë së Bashkuar, përbuzim sulmin që u krye ndaj Sergei dhe Yulia Skripal në Salisburi të Britanisë së Madhe më 4 mars 2018. Një oficer policie britanik, i cili u ekspozua gjithashtu në sulm mbeti i sëmurë rëndë dhe jetët e shumë shtetasve britanikë të pafajshëm. Ne i shprehim mbështetjen ndaj të gjithë atyre dhe admirimin tonë për policinë e Mbretërisë së Bashkuar dhe shërbimet emergjente për reagimin e tyre të guximshëm.
Ky përdorim i një agjenti nervor ushtarak, i një lloji të zhvilluar nga Rusia, përbën përdorimin e parë të një agjenti nervor në Europë që nga Lufta e Dytë Botërore. Është një sulm ndaj sovranitetit të Mbretërisë së Bashkuar dhe çdo përdorim i tillë nga një shtet është një shkelje e qartë e Konventës së Armëve Kimike dhe një shkelje e së drejtës ndërkombëtare, e cila kërcënon sigurinë e të gjithëve.
Mbretëria e Bashkuar informoi tërësisht aleatët e saj se ishte shumë e mundshme që Rusia të jetë përgjegjëse për sulmin. Ne ndajmë vlerësimin e Britanisë së Madhe se nuk ka asnjë shpjegim të besueshëm alternativ dhe theksojmë se dështimi i Rusisë për të adresuar kërkesën legjitime nga qeveria e Mbretërisë së Bashkuar, thekson më tej përgjegjësinë e saj.
Ne i bëjmë thirrje Rusisë që të adresojë të gjitha pyetjet lidhur me sulmin në Salisburi. Rusia duhet në mënyrë të veçantë të sigurojë zbulimin e plotë të programit Novichok në Organizatën për Ndalimin e Armëve Kimike (OPCW).
Brengat tona po rriten gjithashtu në sfondin e një modeli të sjelljes së mëparshme të papërgjegjshme ruse. Ne i bëjmë thirrje Rusisë që të përmbushë përgjegjësitë e saj si anëtare e Këshillit të Sigurimit të OKB-së për të mbrojtur paqen dhe sigurinë ndërkombëtare”.
Agjenti nervor është përdorur tek një ish-spiun rus dhe vajza e tij në Salisbury. Sergei Skripal, 66 vjeç dhe Julia Skripal, 33 vjeç, mbeten në një gjendje kritike në spital. TIRANA TODAY
