Partia Demokratike ka mbledhur sot Kolegjin e Kryetarëve për të vendosur strategjinë pas dorëzimit të mandateve. Mësohet se opozita do të protestojë çdo të enjte përballë Parlamentit.
Pak pas mbledhjesh së kolegjit të kryetarëve të PD-së kreu i kësaj partie Lulzim Basha në një prononcim për media zbulon edhe strategjinë e opozitës së bashkuar. Basha tha se me 7 dhe 16 mars do të organizohet një protestë kombëtare
“Hapi nuk është pa kthim vetëm për opozitën, por edhe për vetë Edi Ramën. Largimi i Edi Ramës është sot misioni më i madh kombëtar që ka çdo shqiptar, se s’do t’i lëmë as zgjedhjet e ardhshme dhe as fatin e shqiptarëve, në dorën e narko-mafias.
Opozita e bashkuar dhe qytetarët do të marrin të gjitha masat, protestë pas proteste, deri sa ta shporrim këtë bandit dhe hajdut nga karriget që ka vjedhur me paratë e krimit. Pushteti do t’i kthehet popullit me zgjedhje të lira dhe të ndershme. Sezoni i protestave vetëm sa ka nisur. Asgjë nuk do ta frenojë energjinë popullore për largimin e së keqes.
Në datën 16 mars do të zhvillohet një tjetër protestë e madhe kombëtare me qëllim rrëzimin e qeverisë. Në këtë protestë do të ketë bashkim dhe zemërim qytetar ndaj reagimit të papërgjegjshëm të kësaj klike kriminale. Akti që kemi marrë ne është pa kthim për opozitën, por është pa kthim edhe për Edi Ramën, siç e zbuluan edhe gazetarët investigativ italianë që Rama ka ndërmend të blejë zgjedhjet prap.
Narko mafia po përgatitet për të blerë zgjedhjet e ardhshme, por opozita dhe qytetarët do të marrë të gjitha masat, protestë pas proteste’, deklaroi ndër të tjera kreu i PD-së, Lulzim Basha.
Opozita beson se nëpërmjet dorëzimit të mandateve dhe protestave të vazhdueshme, do ta detyrojë kryeministrin Rama që të dorëhiqet, duke i hapur rrugë krijimit të një qeverie tranzitore e cila do të organizojë zgjedhje të lira dhe të ndershme.
