Kreu i Partisë Demokratike ka kërcënuar qeverinë me rrëzim të parlamentit, në rast se nuk bëhet vettingu politik. Teksa foli në ceremoninë për kujtimin e 8 Dhjetorit në Qytetin Studenti, Basha tha se nëse nuk do të ketë vetting në politikë, parlamenti do të bjerë dhe do të rrëzohet.
Duke iu referuar protestës së studentëve si një dhjetor i dytë, kreu i PD-së u bëri apel prindërve të studentëve që të mos heshtin por të bashkohen me ta kundër padrejtësisë, vjedhjes, të keqes.
Fjala e Bashës:
T’i prijmë betejës për të hapur politikën, për ta bërë të aksesueshme nga çdo kush, pavarësisht mundësive ekonomike, që të marrin pjesë në vendime.
Vetëm kështu do t’i japim një trase të sigurt ëndrrës së studentëve të dhjetorit të dytë.
Vetëm kështu deputetët, kryebashkiakët, këshilltarët nuk janë produkt i hajdutëve, krimit, vjedhjes, por janë produkt i drejtpërdrejtë i qytetarëve dhe rinisë shqiptare.
Sot në frymëzohemi nga 8 dhjetori i 1990 dhe t’i drejtojmë një apel prindërve të studentëve të dhjetorit të dytë: mos heshtni, mos kini frikë, ngrihuni e bashkohuni me ta kundër padrejtësisë, vjedhjes, të keqes. E keqja zmbrapset kur populli bëhet bashkë.
Le ta japim sot nga ky shesh ultimatumin tonë politik, si testament të Azem Hajdarit dhe dhjetorit 1990: Parlamenti shqiptar ose do të pastrohet nga krimi ose do të rrëzohet.
