Kreu i Partisë Demokratike Lulzim Basha ka dalë menjëherë në një deklaratë për shtyp, pas asaj të kryeministri Rama. Duket se tashmë Rama dhe Basha janë në garë për t’u gjetur zgjidhje studentëve, teksa këta të fundit kanë refuzuar përfshirjen e politikës në kauzën e tyre.
Basha i cilësoi premtimet e Ramës si mashtrime, ndërsa propozoi dy zgjidhje për çështjen e studentëve.
Ai kërkoi që të anulohet ligji për arsimin e lartë dhe të hartohet një tjetër i ri, ndërsa zgjidhja e dytë sipas kryedemokratit është dyfishimi i buxhetit për arsimin e lartë.
Fjala e Bashës:
Pas panikut që e ka mbërthyer, Rama po përpiqet të mashtrojë opinionin publik. Ai nuk ka asnjë plan për të realizuar asnjë nga kërkesat e studentëve. Mashtrimet me të cilat doli sot, nuk zgjidhin asnjë nga problemet e vërteta financare që kanë familjet e tyre.
Për konviktet do presim deri në fund të mandatit. Zgjidhje do ishte nëse populli e terminon brenda këtij 6 mujori mandatin e tij. Paketa më shumë se mashtrim është panik që e ka kapur Edi Ramën.
Rruga e daljes nga ku gjendet sot arsimi është anulimi i menjëhershëm për arsimin e lartë që është zanafilla e së keqes. Ligji i arsimit të lartë është gur themeli mbi të cilin qëndron kjo aferë korruptive. Tarifat sa vijnë e rriten, s’ka asnjë përmirësim të cilësisë së mësimdhënies. Hartimi dhe konsultim të plotë të një ligji modern për arsimin e lartë. PD e ka propozuar, kam folur shumë herë. Demokratizim do të thotë më shumë autonomi. Qeveria do të ketë rol, por jo rol vendimmarrës në bordet e universiteteve. Do të thotë rikonceptim për mënyrën se si do rritet cilësia e mësimdhënies. Këto do i konsultojmë me pedagogët e studentët.
Zgjidhja e dytë është dyfishimi i buxhetit. Së pari të subvencionohen tarifat e studentëve. / TIRANA TODAY
