Pas përplasjeve në Kryesinë e djeshme të Partisë Demokratike, reagoi me një ton të ashpër ish-deputeti Astrit Patozi, i cili ka qenë kritik ndaj Bashës ende pa humbur thellë në zgjedhjet e 25 qershorit.
Megjithatë, kreu i PD-së duket se po mundohet të “qetësojë gjakrat”, teksa ka publikuar një deklaratë në faqen e tij në Facebook.
Pavarësisht përçarjes, që tashmë është e dukshme brenda Partisë Demokratike, Basha vijon të flasë për partinë e tij si “aleancën e vlerave”, ku thekson se kundërshtari i vetëm i demokratëve mbetet aleanca e krimit.
POSTIMI I BASHËS:
PD ka vetëm një kundërshtar, që nuk është thjeshtë një person, por aleanca e krimit. Dhe ne jemi përballë, si aleanca e vlerave. Në këtë aleancë ka vend për mendimin kritik, për debat dhe marrjen e vendimeve siç u mor sot; vendim unanim për të nisur menjëherë një proces analize dhe konsultimi me bazën demokrate me qëllim forcimin, reformimin, bashkimin dhe përballjen me Edi Ramën dhe qeverinë e dalë përmes tjetërsimit kriminal të vullnetit të shqiptarëve.
