Kreu i Partisë Demokratike, Lulzim Basha ka mbërritur rreth orës 13:00 në aeroportin e Rinasit, ku është pritur nga simpatizantë të shumtë pas takimit me presidentin e SHBA-ve, Donald Trump.
Gjatë fjalës së tij, Basha i falendëroi qytetarët për pritjen ndërsa e cilësoi si të jashtëzakonshëm takimin me Donald Trump.
Më tej, Basha tha se vendin tonë e ndajnë edhe 10 ditë nga Republika e ekonomisë së fortë.
“Ju falendëroj për këtë pritje të jashtëzakonshme, mirë se ju gjej në Tiranë. Ju falendëroj për flamujt tanë kombëtare që valëviten krah për krah, flamujve të aleatit tonë të madh strategjik të SHBA-ve nga të cilat po kthehem pas një takimi të jashtëzakonshëm me presidentin e 45-të të SHBA-ve, Donald Trump. Në një vizitë të shkurtër gjatë një jave domethënëse, javës së Shtëpisë së Bardhe dhe presidentit Trump kushtuar një prioriteti madhor për SHBA-të dhe prioritetit numër 1 për ne: punësimit, stazheve, trajnimit, ekonomisë. I jashtëzakonshëm takimi, me përshtypjet më të paharrueshme, e jashtëzakonshme mbështetja e SHBA-ve dhe e Trump për Shqipërinë dhe për shqiptarët, por tani edhe 10 ditë na ndajnë për t’u ndarë njëherë e mirë me Republikën e politikanëve, me Republikën e mashtrimit dhe për t’i hapur derën Republikës së ekonomisë së fortë, se të nesërmes së sigurt për çdo shqiptar e çdo shqiptare. Kjo është ajo që pret bota nga ne, ajo që presin aleatët nga ne!”, tha Basha. /Tirana Today
https://www.facebook.com/lulzimbasha.al/videos/1540777979306711/
