Pas protestës së sotme dhe pas takimit me ambasadorin amerikan, Donald Lu, Lulzim Basha i është rikthyer “Çadrës së Lirisë”.
Gjatë fjalës së tij, Basha tha se do t’i shkojë deri në fund, kauzës së tij për zgjedhje të lira e të ndershme.
Pas 4 orëve në takim me Donald Lu, Basha u shpreh se është i gatshëm për dialog me palën kundërshtare, por me kusht krijimin e një qeverie teknike.
“Ka qenë një ditë e gjatë dhe e lodhshme, por absolutisht e suksesshme për opozitën dhe për qytetarët shqiptarë, për zgjedhje të lira dhe të ndershme.
Dua t’ju falënderoj nga zemra ju për t’i shkuar deri në fund aksionit popullor. Me ne u bashkuan të djathtë dhe të majtë.
Koha po vjen ta kurorëzojmë këtë lëvizje me fitoren që të gjithë shqiptarët presin. Nuk na mungon aspak vullneti dhe vendosmëria për një dialog me kundërshtarët tanë. Ai do të ketë vetëm një temë, qeveri teknike dhe largimin e kësaj qeverie.
Sot ishte vetëm paralajmërimi i parë. Në këtë vend zgjedhje pa opozitën nuk do të ketë kurrë. Votime të diktuara nga krim droga nuk do të lejoj. Kjo është kategorike dhe e pandryshueshme”, tha Basha.
