Në ditën e 61-të të protestës, kreu i opozitës është ndalur tek arrestimi i 18 zyrtarëve të policisë, për drogën e kapur në portin e Durrësit. Pavarësisht faktit që Tahiri nuk mban më postin e ministrtit të Brendshëm, Basha u shpreh se duhet të arrestohet Saimir Tahiri dhe kryemisitri Rama dhe, më pas, pjesëtarët e bandave kriminale.
“Përgëzoj prokurorinë për arrestimin e 18 personave. Drogën e bën shteti i krimit, sepse 18 të arrestuarit janë ushtarët. Niseni me arrestimin e Tahirit dhe përfundojeni me kreun e Bandës”, tha Basha.
Gjithashtu, kryedemokrati, Lulzim Basha, ka vijuar sërish akuzat se kreu i qeverisë me “paratë e drogës” po blen ndërkombëtarët.
Gjatë bashkëbisedimit të tij me përfaqësues të biznesit, Basha tha se Rama po bën çdo përpjekje për të mbajtur pushtetin me forcë, kundër vullnetit të qytetarëve.
“Paratë e drogës duhen investuar. Repubika e vjetër ka qindra miliarda për të humbur dhe do bëjë çdo përpjekje për të ruajtur privilegjet, për të blerë shqiptarë e të huaj që t’i dalin në mbrojtje”, tha Basha.
Nëpërmjet një retorike të pazakontë, Basha e ka quajtur këtë qeverisje si një “shtet leshi”, ku, sipas tij, po pasurohet një grup i vogël personash dhe shumë të tjerë po varfërohen.
“Dëgjoj vetëm një fjalë, ‘nuk ka lekë’, ‘s’kam lekë’, paratë e karburantit, paratë e taksapaguesve, ku shkojnë? I mbledh ky, shteti i leshit. Sepse vetëm për tenderin e karburantit, tenderoi 4.7 miliardë lekë vetëm këtë vit. Duhet të funksionojë shteti i leshit apo republika e vjetër”, u shpreh Basha.
