Kreu i Partisë Demokratike po mban një fjalim në “Çadrën e Lirisë”, një dot pas protestës, ku ka falënderuar qytetarët për pjesëmarrjen masive.
Basha ashpërsoi gjuhën, teksa ritheksoi se Rama ka dy alternative: qeveri teknike, ose përndryshe opozita do marrë fatin në dorë në të gjitha format.
FJALIMI I BASHËS:
“Thelbi i lëvizjes sonë politike ka qenë dhe mbetet të zëvendësojmë një kupolë që kontrollohet nga krimi dhe droga me një qeveri që kontrollohet nga ju qytetarët shqiptarë.
Kjo vjen nga zgjedhje të lira, ky ishte mesazhi madhështor i protestës së djeshme. Mirënjohje të veçantë kam për aleatët e koalicionit tonë opozitar, mirënjohja ime për partitë opozitare, për kryetarët e tyre, për besnikërinë, qëndresën, besimin tuaj të dashur aleatë, por mbi të gjitha për besnikërinë të qytetarëve shqiptarë dhe kauzës së tyre të drejtë.
Shqiptarët folën: nuk ka e nuk do të ketë zgjedhje fasadë! Nuk ka e nuk do të ketë parlament të diktuar nga krimi dhe droga, nuk ka e nuk do të ketë kurrë më zgjedhje pa popullin, pa opozitën, zgjedhje moniste!
Republika e Re, e cila së shpejti do të zëvendësojë institucionalisht të vjetrën që po bie, kërkon tranzicionin e butë përmes zgjedhjeve të lira e të ndershme, të cilat mund të sigurohen vetëm përmes një qeverie teknike.
Por, le të jemi të qartë. Republika e Re e ka nisur rrugën e saj, nuk ka e nuk do të ketë asnjë hap prapa. Nëse Republika e Vjetër nuk tërhiqet nga plani ogurzi për të bërë zgjedhje fasadë, për t’u angazhuar në një proces farsë elektoral monist, nëse nuk pranon përmes dialogut politik, atëherë Republika e Re do të marrë në dorë të gjithë format fatet e qytetarëve, institucionet, kushtetutën e re, paqësisht por me vendosmëri totale do të përmbysim Republikën e Vjetër. Me popullin nuk mund të luhet më.
Ose përmes qeveri teknike, ose përmes përballjes totale midis te vjetrës që po ikën dhe te resë që ka ardhur.
Le ta dinë cinikët, ndonjë media e blerë që synonte të censuronte pjesëmarrjen masive gjigante në protestë, le ta dinë mirë se ajo që nisëm dje nuk do të ndalet. Zgjidhja mes shqiptarëve, kishim 2: njërën e kemi bërë. Nëse do ulnim kokën e të pranonim fatin tonë, përgjigjen e mori dje nga pjesëmarrja jonë.
Zgjidhja e dytë është: ose ta shmangim krimin në pushtet përmes qeverisë teknike, ose do ta përmbysim Republikën e Vjetër përmes marshimit, bashkimit, qëndresës popullore të qytetarëve përmes Republikës së Re.” /TIRANA TODAY
