Kreu i Partisë Demokratike, Lulzim Basha, gjatë ritualit të tij të përditshëm përpara mbështetësve në “Çadrën e Lirisë”, theksoi se keqqeverisja e Edi Ramës po falimenton biznesin në vend.
“Sikurse u shprehën sot, në Sheshin e Lirisë, sipërmarësit dhe bizneset e vogla, të cilët përbëjnë 80 për qind të ekonomisë dhe burimin kryesor të punësimit, ata po falimentojnë nga abuzimi i shtetit me taksat, rregullat e ligjet dhe dhuna arbitrare e inspektorëve shtetërorë.”
Ai vuri në dukje se “ekonomia shqiptare është shkatërruar nga një qeveri e lidhur me krimin dhe nga pushtetarë të korruptuar kokë e këmbë. Gjendja ekonomike e vendit para së gjithash është rezultat i një komploti të madh kundër qytetarëve shqiptarë.”
Ndërsa shtoi se: “Përveçse një komplot politik, i maskuar pas një debati publik që i ngjan një teatri kukullash, republika e vjetër është një komplot ekonomik kundër qytetarëve, për t’i grabitur ata dhe për t’jua dhënë të gjitha burimet ekonomike dhe financiare të vendit një grushti njerëzish, politikanë të korruptuar dhe klientëve të tyre. Ky komplot i republikës së vjetër kundër qytetarëve do të marrë fund vetëm me zgjedhje të lira e të ndershme.”
