Kryedemokrati Basha, ka apeluar ndaj banorëve të Valiasit në Kamëz, që në datën 16 shkurt të bëhen bashkë para Kryeministrisë, për ta larguar Edi Ramën dhe qeverinë e tij. Basha u takua me banorët e përmbytur të Valiasit, të cilët nuk janë kompensuar nga Edi Rama dhe u kujtoi atyre, se qeveria e Ramës është hajdutëri me ligj.
“E mbaj mend shumë mirë atë ditë kur reshjet arritën kulmin, dhe kjo zonë u përmbyt e gjitha. Kam qenë tek shumë prej jush, dhe kam parë me sytë e mi se si banesat kishin dalë tërësisht jashtë funksionit. Kam parë me dhimbje të madhe, më është dashur të përmbaja veten kur shikoja lot të prindërve, sepse i gjithë mundi i jetës së tyre dhe kursimet e fëmijëve nga emigracioni i kishte marrë lumi.
Në krye të detyrës ishin vetëm punonjësit e Bashkisë dhe kryetari i Bashkisë. Asnjë zyrtar i shtetit, i qeverisjes qendrore nuk shihej. Edhe kur i kërkonin në telefon në raste emergjence, nuk dukeshin.
Vetëm pas tre apo katër ditësh kur situata u qetësua, por gjendja vazhdonte të mbetej e mjerë, erdhi fantazma. Erdhi dhe lëshoi dy apo tre batuta e barcaleta, u rrahu krahun dy-tre punëtorëve të Bashkisë që po punonin, dhe i tha kryetarit, do të kesh fondin 700 mijë Euro që të përballosh emergjencën. Natyrisht ishte një tjetër mashtrim. Asnjë kokërr leku nuk iu dha Bashkisë së Kamzës. Asnjë cent dëmshpërblim 700 familjeve të cilët u përmbytën për shkak jo vetëm të motit, por pakujdesisë dhe neglizhencës së Edi Ramës.
Sot kemi ardhur tj’u kërkojmë ndihmë, sepse zgjidhja tani nuk është më në duart e një partie politike, por në duart e qytetarëve shqiptarë. Ju duhet të vini të marshoni në 16 shkurt, që t’i japim njëherë e mirë zgjidhje kësaj situate.
Kjo është kërkesa për ndihmë dhe ftesa që iu bëj në emër të opozitës”, u shpreh Basha gjatë takimit me banorët e Valiasit.
