Kreu i Partisë Demokratike, Lulzim Basha akuzoi Ramën se ka kapur drejtësinë dhe Prokurorinë, ndërsa shtoi se në këto kushte është e pamundur që çështja Tahiri të zbardhet.
Në një deklaratë për mediet, Basha tha se PD ka gati kërkesën drejtuar Kuvendit për ngritjen e një Komisioni Hetimor për çështjen Tahiri, ndërsa hodhi një sërë akuzash në drejtim të Ramës, Xhafajt dhe Policisë së Shtetit.
“Partia Demokratike ka marrë vendimin të dorëzojë kërkesën për një komision hetimor për çështjen e Tahirit. Opinioni publik është njohur me faktin se për 2 vite me radhë, ministria e Brendshme, kryeministri, Policia e Shtetit ishin në disponim zyrtar të informacionit se kjo bëhet nëpërmjet urdhrit dhe bekimit të kupolës së shtetit.
Rama e ka pasur këtë informacion mbi tavolinë, Saimir Tahir dhe Çako e kanë pasur në mënyrë zyrtare nga Interpoli, Europoli, nga denoncimet e opozitës dhe nga mediat. Po Rama dhe qeveria kanë vendosur t’i varrosin këto fakte, për 1 arsye të vetme: droga është bërë nën bekimin e qeverisë. Rama ka shkelur ligjin, rregulloren e parlamentit, duke e kthyer atë në gjykatë”, tha kreu i PD-së.
Për sa i përket përplasjes me artistët për teatrin, Basha tha se mbështet plotësisht artistët dhe kauzën e tyre, ndërsa i bëri thirrje Ramës që të tërhiqet nga plani ogurzi për ndërtimin e kullës te teatri.
“Dua të shpreh mbështetjen për kauzën e aktorëve, paralajmëroj Edi Ramën që ka 20 vjet që planifikon të ndërtojë kullë te teatri kombëtar. E paralajmëroj të heqë dorë nga ky plan ogurzi.
Borde që emërohen nga kryeministri, zgjidhen nga ai. Artistët do të jenë ata që do vendosin përmes votave të vërteta për mënyrën e shpenzimit të të ardhurave dhe drejtuesve të tyre. Arsimi i Lartë është në koma dhe arsyeja është ligji klientelist.”
I pyetur mbi zgjedhjen e Veliajt deputet pas largimit të Halimit, duke mos respektuar kuotat gjinore, Basha tha se kjo nuk është në dorën e tij, pasi është KQZ ajo që vendos se kush do të marrë mandatin:
“Astrit Veliaj është numri 2 në PD, KQZ vendos kush do të marrë mandatin.”
Më tej, kryedemokrati shprehu skepticizmin e tij për zbardhjen e cështjes Tahiri, me këtë drejtësi, që sipas tij është e kapur nga Rama.
Komisioni Hetimor nuk heton veprën penale, por heton përgjegjësitë e Ramës dhe të institucioneve të ministrisë. Një drejtësi e pakapur do të kishte zbardhur sot rastin Tahiri, për këtë arsye Rama është investuar, ka kapur prokurorët dhe tani s’ka asnjë shans që rasti Tahiri të zbardhet nga drejtësi, aq më pak pas ekstradimit të financierit të Habilajve.
Gjiknuri dhe Ahmetaj janë denoncuar në media për blerje votash, këto nuk mund të zbardhen sa kohë që drejtësia është e kapur. TIRANA TODAY
