Kreu i PD-së Basha, në një takim të mbajtur me qytetarët në Vlorë, i ka ftuar ata së bashku me të gjithë socialistët e tradhtuar, që të protestojnë në 16 shkurt, për ti dhënë fund grushtit të shtetit. Sipas kryedemokratit, askush nuk përfiton nga ky sistem, pasi përfaqëson vetëm interesat e Edi Ramës dhe një grushti oligarkësh.
“Unë besoj se ky brez, ka mundësitë që të rinjtë të shkollohen. Unë besoj se mund të krijojmë paga dhe vende pune me kushte dinjitoze. Por na duhet një qeveri që mendon për ju. A mund të mendojë për ju një qeveri që ka ardhur në pushtet me ndihmën e krimit? Me Gjushët, me Shullazët, me Bajrat, me Agron Xhafajt?!
Ardhja në pushtet e Edi Ramës është komentuar nga ‘Zëri i Amerikës’, si grusht shteti jo nga ushtarakët, por nga banditët.
Vetëm disa fletë nga dosja e hetimit zbulojnë se si janë vjedhur votat e shqiptarëve në 4 qarqe. Imagjinoni që ka me mijëra orë të tilla përgjimi që përfshijnë edhe kupolën e Rilindjes, Edi Ramën, në këtë shitblerje votash. Emri i tij është në ato dosje, se ai ka dhënë urdhrin.
Asgjë nuk do të ishte e mundur nëse në krye të kësaj afere korruptive, nuk do të ishte vetë kreu i qeverisë. Atë duhet ta zgjidhte Prokuroria, por edhe ajo është kapur.
Ne u përpoqëm ta pastrojmë këtë sistem nga brenda, me ligje, por ky nuk mund të pastrohet. Ky sistem i kalbur duhet përmbysur. Ndryshe rruga jonë drejt Evropës do të mbetet e bllokuar.
Më 16 shkurt duhet t’i japim fund grushtit të shtetit! Ftoj edhe socialistët e tradhtuar. Mesazhi që ju jap sot nuk është vetëm i opozitës: pritshmëritë e Europës, të Perëndimit janë tek i vetmi faktor që mund të sjellë ndryshimin: Jeni ju!”.
