Kreu demokrat Lulzim Basha, duke folur në mitingun elektoral të PD në Cërrik, foli për prioritetet që qeveria e drejtuar prej tij, do të ketë për fuqizimin e ekonomisë, si rruga më e mirë drejt integrimit.
Sipas tij, një ndër shtyllat kryesore të ekonomisë është produkti i brendshëm, dhe si i tillë do të jetë në qendër të vëmendjes së qeverisë së tij.
Në këtë kuadër ai u premtoi fermerëve që “për mandatin e ardhshëm të qeverisë, do të japë 100 milion euro subvencione”.
Një tjetër mbështetje e fortë e qeverisë së Bashës do të jetë edhe mbyllja, siç tha ai, e doganave për mallrat e eksportit, në mënyrë që fermerët shqiptarë të kenë mundësinë të shesin produktet e tyre duke mos u kërcënuar nga konkurrenca e pandershme.
Duke akuzuar qeverinë “Rama” që nuk arriti të zbusë sadopak nivelin e papunësisë, Basha premtoi se “mandatin e ardhshëm do të punësohen 10 mijë të rinj çdo vit”.
Tjetër premtim i Bashës ishte edhe “ulja e TVSh-së, taksa e sheshtë 9 %, ulja e taksës për biznesin e vogël dhe futja në garnizone të ushtrive të inspektorëve dhe tatimorëve, çlirimi i qindra milionë eurove në xhepat tuaj si rezultat i uljes së çmimeve. Me uljen e TVSh-së plot 400 milionë euro të cilat sot përpihen nga oligarkët do të të jenë në xhepat tuaja”
Basha përsëriti ftesën drejtuar rivalit të tij Rama, për debat të hapur. Duke iu referuar pjesëmarrjes së kryeministrit në një aktivitet sportive sot në Parkun Olimpik të Tiranës, Basha tha se “më 25 qershor është radha e shqiptarëve t’i bëjnë kosh Edi Ramës”.
