Messi do të jetë pjesë e Barcelonës për shumë vite. Do të rinovojë apo jo ylli argjentinas kontratën e tij me klubin katalanas? Kjo është një telenovelë që vazhdon prej muajsh, por mesa duket me fundin shumë pranë.
Ai që jep garanci në lidhje me këtë çështje është Presidenti Josep Maria Bartomeu, i cili në një intervistë është shprehur se kontrata e re e Messit është firmosur, jo nga vetë sulmuesi, por nga i ati, sigurisht me autorizimin e numrit 10 të katalansve. Pesë herë fituesi i “Topit të Artë” sipas asaj që konfirmon Bartomeu do të jetë pjesë e blaugranave deri në 2022.
“Kontrata është firmosur nga babi i Messit, i cili është autorizuar nga djali i tij për ta bërë një gjë të tillë. Foto zyrtare me firmën e Messit do ta bëjmë shumë shpejt, nuk ka vend për tu nxituar. Një gjë është e sigurt, Messi do të vazhdojë të jetë pjesë e Barcelonës për shumë vite, pasi marrëveshja e re përfundon në 2022, por besoj se nëse Leo dëshiron mund ta zgjasim akoma edhe më shumë. Numri një i Barcelonës foli edhe për çështjen Iniesta. Bartomeu deklaroi se mesfushori e di shumë mirë që dëshira e drejtuesve është që ai të vazhdojë të jetë pjesë e skuadrës dhe se bisedimet me menaxherin janë në fazë të avancuar, transmeton Supersport.
“Iniesta e di që ne duam që ai të vazhdojë të luaj në Camp Nou deri sa vetë lojtari të ketë dëshirë. Jemi duke biseduar me menaxherin e tij dhe ekziston vullneti që Iniestës ti vihet në dispozicion një kontratë që e mban atë të lidhur me Barcelonën përsa kohë ai të dëshirojë. Do të jetë një marrëveshje speciale sepse ai është një futbollist special.”
Në fund Neymar. Bartomeu u shpreh se që pas kthimit nga turneu i Amerikës kishte vënë re se braziliani ishte në dilemë për të ardhmen e tij dhe në këtë moment kishte kuptuar që bashkëpunimit i kishte ardhur fundit. Presidenti shpreson që Uefa të hetojë Psg për shumën stratosferike që parisienët paguan për transferimin e Neymar.
