Kriza që është duke kaluar Barcelona duket se është e ndikuar nga një përçarje mes Lionel Messit dhe Gerard Pique. Në emisionin “El Chiringuito de Jugones” është thënë s qendërmbrojtësi e ka kritikuar kapitenin pasi ai nuk del para mediave për të folur për situatën që është duke kaluar klubi katalanas. Messi është graduar kapiten i Barcelonës që pas largimit të Andres Iniestas nga klubi.
“Pique është i pakënaqur me faktin se Messi nuk përballet me shtypin në momentet e vështira të skuadrës”, është thënë në programin spanjoll. “Sipas tij, Leo flet vetëm kur nuk është në Europë, kur grumbullohet me Argjentinën”.
Ndërkohë, Messi duket se i është kundërpërgjigjur duke fajësuar mbrojtjen e katalanasve për rezultatet zhgënjyese të marra në ndeshjet e fundit. “Ai i ka thënë atij se po pësojnë shumë gola”. “Ai ia ka bërë të qartë Pique-së se mbrojtja nuk po luan në nivelin që duhet”, është thënë në “El Chiringuito”. Messi dhe Pique janë rritur së bashku në akademinë e Barçës dhe zërat për një krisje të marrëdhënieve mes tyre kanë shokuar tifozët e skuadrës “blaugrana”.
Pavarësisht rezultateve, kjo gjendje mes dy liderëve të ekipit nuk bën gjë tjetër përveçse rëndon akoma më shumë situatën te katalanët, që do të kenë dy ndeshje të vështira këtë javë: në Angli kundër Tottenhamit në Champions League dhe në “Mestalla” kundër Valencias për kampionatin spanjoll.
