Jashtë planeve të Zidane dhe i nxjerrë në shitje nga klubi, por është Gereth Bale ai që ndihmon Real Madrid në fillimin e vështirë të sezonit të ri. Uellsiani shpëtoi “los blancos” nga humbja dhe me dy golat e tij vendosi barazimin 2-2 në transfertën kundër Villareal. Vendasit kaluan në epërsi me Moreno që në minutën e 12-të të sfidës. Në shtesën e pjesës së parë, Bale ndali topin në rrjetë dhe vendosi ekuilibrat përpara pushimit.
Me rikthimin në fushë për fraksionin e dytë, Villareal “flirtoi” me fitoren, kur në minutën e 74-ërt, Gomez realizoi edhe golin e dytë për të zotët e shtëpisë. Por, katër minuta nga fundi i kohës së rregullt Bale barazoi sërish rezultatin, përpara se të largohej nga fusha me kartonin e kuq në kohën shtesë.
Një periudhë aspak të mirë po kalon edhe Barcelona, që të shtunën nuk shkoi më shumë se barazimi 2-2 në fushën e Osasuna. Mungesat e shumta po ndikojnë në paraqitjet e kampionëve spanjollë, që deri tani kanë zhgënjyer të gjitha parashikimet. Me rivalët direkt në krizë, Atletico Madrid po shfrytëzon në mënyrën më të mirë situatën dhe kryeson i vetëm me pikë të plota pas tre javëve të para.
Të besuarit e Diego Simeones arritën një fitore të madhe me përmbysje 3-2 kundër Eibar. Miqtë surprizuan në fillimin e pjesës së parë. Që në minutën e shtatë, Charles shënoi golin e epërsisë, ndërsa në të 19-ën, Arbilla dyfishoi shifrat. Joao Felix ktheu në lojë të zotët e shtëpisë, kur ngushtoi diferencën në minutën e 27-të.
Kaq për pjesën e parë, ndërsa pas pushimit madrilenët plotësuan përmbysjen e madhe me golat e Vitolo dhe Thomas në limitet e kohës së rregullt, duke u shkëputur nga rivalët direktë në tabelën e renditjes. Vetëm barazim për Sevilla në javën e tretë në La Liga, ndërsa fitore të rëndësishme siguruan Athletic Bilbao dhe Valencia.
