Shqipëria është ndalur në një barazim pa gola ndaj Jordanisë në “Elbasan Arena”. Panucci edhe në këtë sfidë vjen me shumë ndryshime në formacion, por edhe skema ishte ndryshe nga ajo që kemi parë në ndeshjet e para. Por edhe ky eksperiment nuk ka funksionuar, pavarësisht se kuqezinjtë dominojnë ndeshjen, por kujtojmë që kundërshtari ishte i një niveli të dobët.
Por duke pasur parasysh se ishte një ndeshje miqësore, që shërben për të krijuar më mirë idenë se si do të përballemi me Izraelin dhe trajneri Panucci do të ketë të thjeshtë justifikimin.
Kundër Jordanisë ishte një miqësore me ritëm të ulët, dominuar nga kuqezinjtë, por me raste të pakta për shënim. Të gjitha rastet ishin në portën jordaneze dhe dukej sikur do shënonim në çdo moment, por kemi probleme të mëdha dhe kryesori është ai i mungesës së njeriut gol. Armando Sadiku ka lënë një boshllëk të madh në sulm dhe Manaj nuk është ende gati ta mbushë.
Dy herë pretenduam për penallti, arbitri nga Kosova nuk ishte dakord, ndërsa më pas humbëm edhe raste të mira, por mungoi ritmi i lartë dhe presioni konstant në portën jordaneze. Në fundin e takimit Uzuni ishte i pafat, sepse goditi shtyllën, por Shqipëria nuk bindi dhe nuk i kënaqi tifozët besnikë që ishin në stadium, sidomos TKZ, që nuk u ndal për gjithë ndeshjen së mbështeturi kuqezinjtë.
