Laureta Nikolli e cila është një nga banoret e lagjes “5 Maji”, mësohet se është gjobitur me 1 milion e 280 mijë lekë për “ndërtim pa leje”. Gjoba i është vendosur më 15 shkurt. Afati për të liruar banesën i është lënë më 22 shkurt, ditë kur Inspektoriati i Mbrojtjes së Territorit do të rinisë aksionin në të njëjtën lagje. Vetë Nikolli ka deklaruar se ka ndërtuar një shtëpi ekologjike prej druri, por Bashkia Tiranë nuk ia njeh.
Nikolli është gjobitur për “ndërtim pa lejen përkatëse” të një strukture druri me sipërfaqe 40 metër katror. Sipas procesverbalit të IMT, ky objekt është ndërtuar pa leje dhe pengon zbatimin e projektit për zonën e re në zhvillim në njësinë 4 dhe 8 tek “5 Maji”. Por Nikolli, ka reaguar në lidhje me këtë gjobë që i është vënë. Ajo shprehet se është gjobitur vetëm ajo, sepse duan t’i bëjnë presion. Ajo është njoftuar nga Bashkia Tiranë përmes një shkrese për prishjen e objektit të kundërligjshëm.
“Jeni të lutur në kuadër të një bashkëpunimi me ju dhe në dobi të komunitetit për të realizuar këtë vepër publike, të bëni lirimin e objektit” Nga IMP, Bashkia Tiranë, do të ndërhyhet në datë 22.02.2022″, thuhet në shkresën e Bashkisë.
