Mbrëmjen e sotme sërish banorët e Astirit kanë dalë në protestë, për të kundërshtuar prishjen e shtëpive të tyre. Ata kërkojnë anulimin e projektit ose dëmshpërblim 100 % të pronave të tyre në vlerën e tregut.
Sonte ka qenë dita e 57 e protestës, ndërsa banorët kërkojnë edhe hetim për Gjiknurin dhe Afrim Qendron.
Juristi Artan Manushaqe ka qenë sot pranë banorëve, ndërsa ka paralajmëruar autoritetet se do të mbajnë përgjegjësi për letrën që u është dërguar në shtëpi banorëve se nëse nuk prishin banesën e tyre do të gjobiten me 5 milionë lekë të vjetra.
“Kjo është shkelje e plotë e ligjit, e për këtë ata do të mbajnë përgjegjësi një më një. Turpi i tyre do marrë fund shumë shpejt”, tha ndër të tjera juristi.
Në përkrahje të banorëve kanë shkuar edhe deputetë të opozitës, ku Tritan Shehu u shpreh se banorët treguan se projektet janë krijuar për qëllime të mbrapshta e jo për të mirën e qytetarëve.
