Sërish protestë në qytetin e Durrësit. Këtë herë, banorët e Sukthit kanë kërkuar nga bashkia e Durrësit që të gjejë një zgjidhje urgjente për çështjen e plehrave. Kjo pasi plehrat depozitohen dhe më pas digjen në një fushë pranë Sukthit.
Banorët ngrenë shqetësimin, pasi shprehen se bloza e plehrave po iu rrezikon jetën dhe se era e rëndë futet në çdo ambient të shtëpisë së tyre.
Duke folur për News 24, një nga banorët tha:
“Sot protestojmë për mbeturinat për tymin që i bëri kancerin popullit të Sukthit që 50 ditë ky popull po rri në vuajtje, në ambient të ndotur. Fëmijët po shkojnë në spital dhe as spital s’ka çfarë t’u bëjë me këtë blozë që vjen nga mbeturinat. Kemi protestuar shumë herë por nuk na i vë veshin kush. I gjithë tymi hyn brenda”.
Një tjetër banor paralajmëroi se nuk do t’i çojnë fëmijët më në shkollë dhe se do të vijojnë protestat:
“Nëse nuk merren masa deri ditën e hënë, shkolla 9-vjeçare e qendrës do bojkotohet. E kemi marrë këtë vendim si banorë. Fëmijët tanë nuk do shkojnë në shkollë. Deri të hënën të merret një zgjidhje nga bashkia ose këshilli bashkiak”, u shpreh një tjetër banor.
