Disa banorë të Himarës kanë bllokuar punimet e një objekti në afërsi të fushës së sportit dhe u kanë kërkuar punonjësve që të ndalin punimet.
Sipas banorëve, ky objekt po ndërtohet pa leje, ndërsa nuk jepet asnjë e dhënë se për çfarë ndërtimi bëhet fjalë.
Është dashur ndërhyrja e policisë për normalizimin e situatës, ndërsa banorët pretendojnë se objekti po ndërtohet në tokën e banorëve të vjetër të Himarës, të cilët jo vetëm nuk po u jepet certifikata e pronësisë, por edhe po u zaptohet prona padrejtësisht, raporton Balkanweb.
Protestuesit shtojnë se bashkia e Himarës po tenton të kryejë ndërtime në mënyrë banditeske dhe pa asnjë leje, sepse toka i ka pronarët e saj pavarësisht se nuk po i jepet leja përkatëse.
Ata kanë kallëzuar në prokurori bashkinë si dhe firmën që po kryen punimet, pasi sipas tyre po përdhoset Historia e Himarës dhe është një ndërtim i mirëfilltë pa leje. Banorët e Himarës kanë denoncuar gjithashtu dhe dëmtimin e pemëve nga ana e firmës se bashku me bashkinë duke zhdukur kështu një vlere natyrore të kësaj zone.
