Vrasja në Bularat të Gjirokastrës ka shkaktuar reagime të shumta, e për rrjedhojë edhe tension mes grekëve dhe shqiptarëve.
I ashpër ka qenë reagimi zyrtar i Greqisë, ndërsa nuk ia ka lënë mangët as Ministria e Jashtme e Shqipërisë.
Por, banorë të fshatit shprehen se janë të tronditur nga kjo ngjarje. Në një prononcim për Report TV, një banore minoritare duke folur greqisht shprehet se Kaçifas nuk duhej vrarë “pasi ishte njeri dhe jo kafshë”.
“Nuk mund të vritej, ishte njeri dhe jo kafshë.”
Një tjetër banor minoritar i fshatit, gjithashtu u shpreh kundër vrasjes së tij, teksa tha se ai ishte një djalë i mirë dhe se interesohej për ta.
“Ishin shumë forca policie dhe duhet ta kishin kapur të gjallë jo ta vrisnin. Ai ishte djalë i mirë dhe interesohej për ne, ai ngriti flamujt në fshat. Familja e tij është e mirë dhe ne si fshatarë jemi mërzitur për humbjen e tij. Nuk ka bërë keq në fshat.”
Ekstremisti grek Konstandinos Kaçifa hapi zjarr ndaj efektivëve të policisë për më shumë se 30 minuta. Atij iu kërkua që të hidhte armën dhe të dorëzohej, por 35-vjeçari nuk ka pranuar.
Madje ai ka qëlluar me armë në drejtim të bluve, në këtë moment RENEA e ka ekzekutuar duke e qëlluar në kokë dhe në gjoks.
Pas vrasjes atij iu sekuestruan një kallashnikov, dy karikatorë, një çantë me fishekë luftarakë, 31 gëzhoja, ndërsa në banesë uniforma ushtarake. Konstantinos Kacifa minoritar me origjinë nga Bularati ka hyrë në Shqipëri në datë 2 tetor, ndërsa në ditët e fundit kishte vendosur disa flamuj grek në fshat.
