Banorët e lagjes “Ali Demi” në Tiranë tregojnë në emisionin “STOP” se kanë që në vitin 2015 që i kërkojnë bashkisë mirëmbajtjen e lulishtes së tyre, por nuk kanë një reagim. Gazetarja e emisionit iu drejtua përgjegjësit të Drejtorisë së Gjelbërimit dhe Pastrimit, Nevret Jahollari. Ky i fundit tha se deri tani kanë qenë zona të tjera prioritare për mirëmbajtjen e lulishtes. Por sipas tij, në muajin Tetor kjo drejtori do të plotësojë kërkesën e banorëve të lagjes “Ali Demi”.
“Ne kemi një problem për lulishten këtu. S’kemi ku rrinë as të moshuar e as fëmijë. Janë dy vende këtu rreth që janë bosh dhe nuk shfrytëzohen. Në vitin 2011, ish – kryetari i bashkisë ndërhyri dhe na e la këtë vendin këtu. Mbollën ca pemë ata, të tjerat i kemi mbjellë ne vetë me forcat tona. Vetë i kemi vaditur, vetë i përpunojmë se s’ka vënë dorë njeri. S’kam lënë vend që s’kam vajtur”.
Banorët e lagjes “Ali Demi” ankohen se prej 2 vitesh kërkojnë nga bashkia mirëmbajtjen në lulishten e tyre dhe shtimin e hapësirave të gjelbërta, por reagimi i vetëm i tyre ka qenë para zgjedhjeve për të marrë votat e qytetarëve.
“Do t’i thoja kryetarit të bashkisë nëse do sillte nënën e vet ai këtu të ulej me mua dhe Edi Rama le të vijë këtu. Po e solli ai, do rrimë dhe ne”. Gazetarja e emisionit “STOP” iu drejtua Drejtorisë së Gjelbërimit dhe Patrimit për të pyetur nëse do të ndërhyjnë në lulishten e lagjes “Ali Demi”. Drejtuesi i saj, Nevret Jahollari u shpreh se gjatë muajit Tetor do të nisë puna për rikonstruktimin e zonës me gjelbërim.
I pyetur nga gazetarja se përse nuk i është përgjigjur që në vitin 2015 kërkesës së banorë, drejtori Jahollari tha: “Ne kemi filluar punën në Nëntor të vitit 2015 dhe prioritetet kanë qenë nga më të ndryshmet. Në këtë zonë është ndërhyrë, por nuk është plotësuar me të gjithë elementët dekorativë”. Banorët e lagjes “Ali Demi” morën përgjigjen e kërkesës së tyre për gjelbërim pas 2 vitesh. / tvklan.al
